Isang matulunging Kapitan ang namimigay ng Upo sa lahat ng Dumadaan

 

Isang matulunging Kapitan sa Imus ang namimigay ng upo sa mga motorista at sa mga taong dumadaan.

Sa panahon ng matinding pagsubok ay nangingibabaw ang kabaitan at pagiging matulungin sa kapwa, kagaya na lamang ng isang butihing opisyal ng isang barangay sa Imus.

Isang kapitan sa Imus, Cavite ang namataang namimigay ng mga gulay na upo sa mga dumaraang motorista sa kalsada. Maaaring inakala ng iba na nagbebenta lang ito ng gulay dahil pinapara pa ng kapitan ang bawat dumaraan para maabutan ng upo, ngunit ipinamamahagi lang ito ng libre.

Ang lalaking ito ay napag-alamang kapitan pala sa Barangay Bucandala IV sa may Imus sa Cavite. Siya si Kapitan Gary Bacos at kilala na ito roon sa kanyang pagiging natural na matulungin sa kanyang nasasakupan, sa katunayan ay hindo lamang ang pamimigay ng gulay ang una nitong ginawa para makatulong sa mga tao.

Hindi pa man naipapatupad ang ECQ sa buong Luzon ay aktibo na umano ito sa pamamahagi ng tulong sa kanyang nasasakupan. Maliban rito ay nakapaghatid na rin ito ng tulong noon sa mga taong apektado sa pagsabog ng Bulkang Taal ilang buwan lang ang nakalipas, kaya naman masasabing natural na matulungin ang kapitan na ito, malapit man o malayo sa kanyang nasasakupan.

Ngayong panahon ng krisis ay napakahalaga na gampanan ng isang may tungkulin ang pagtulong sa kanyang nasasakupan, kaya mas lalo pa nitong pinag-iigihan ang pamamahagi ng ano mang tulong na kayang nyang ibigay.

Tunay ngang kahanga-hanga ang mga katulad ni Kapitan Gary na talaga nasa puso na ang pagtulong at pagbibigay ng kanyang serbisyo sa publiko at sa mga ganitong hindi magandang pangyayari sa ating mga buhay ay kapansin-pansin lalo ang kabaitan ng mga taong katulad niya.

Saludo naman ang lahat ng nakakita at nakarinig ng tungkol sa kabutihan ng kapitan at marami ang humihiling na nawa'y ang lahat ng mas may kakayahan sa buhay ay mamahagi rin sa mga higit na nangangailangan.